Hoxe, luns 17 de agosto, damos o pistoletazo de saída a Eu Son Noite Meiga 2026, unha iniciativa que fai que a maxia da Noite Meiga comece moito antes da propia celebración e se espalle por diferentes recunchos de Sarria.
Este ano, comercios e locais de hostalaría volven converterse en cómplices da lenda. En total, 77 establecementos participantes súmanse á iniciativa: 57 comercios e 20 locais de hostalaría nos que, desde hoxe, haberá diferentes formas de entrar no universo da Noite Meiga.
Caixiñas dos Desexos, Tarxetas Máxicas, manteis do Xantar Feiticeiro e pulseiras meigas serán algunhas das pistas que atoparás ao percorrer Sarria.
Deixa o teu desexo para a Danza da Noite Meiga
Unha das accións máis especiais de Eu Son Noite Meiga son as Caixiñas dos Desexos.
Cada establecemento colaborador contará cunha para que poidas escribir e depositar nela ese desexo que che gustaría confiar á maxia da noite.
Non será un desexo calquera: os recollidos nas caixiñas formarán parte da Danza da Noite Meiga, cando serán queimados durante a celebración. 🔥
Un pequeno xesto que permite comezar a vivir a festa desde hoxe e formar parte dela dun xeito moi especial.
Mercar no comercio local tamén ten premio
A maxia continúa nos comercios participantes.
Por cada compra realizada recibirás unha Tarxeta Mágica. O reto é conseguir 3 selos de 3 establecementos diferentes.
Unha vez completada, poderás trocala por unha Saca dos Trasgos no Lar Social, durante os días indicados.
Así que esta é tamén unha boa ocasión para percorrer Sarria, visitar os seus comercios e descubrir todo o que agochan os establecementos que se sumaron a Eu Son Noite Meiga 2026.
O Xantar Feiticeiro chega ás mesas
A hostalaría tamén entra de cheo na lenda.
Se durante estes días paras a tomar algo, vas de petiscos, xantas ou ceas nalgún dos locais participantes, fíxate ben nas mesas.
Os Manteis do Xantar Feiticeiro engalanarán os establecementos de hostalaría colaboradores e levarán a identidade da Noite Meiga tamén aos momentos de encontro arredor da mesa.
E busca tamén as pulseiras meigas
Hai outro sinal de que a Noite Meiga xa está máis preto: as pulseiras oficiais.
Poderás atopalas nos locais participantes e levalas contigo como parte desta edición de Eu Son Noite Meiga 2026.
Porque este ano queremos, máis ca nunca, que Sarria enteira se converta en cómplice da lenda.
Establecementos participantes en Eu Son Noite Meiga 2026
- Comercios participantes: Bicarelo; Brissa Salón; Cactus Rose; Calzados Gayoso; Calzados Veiga; Carlin; Carpe Diem; Casa De San Pedro de Cerceda; Casa Regina; Cris Abad; Dimar Moda; Distribuciones Sangil; DPont; Duet Moda; Electrodomésticos A Casa; Electronova; Estanco Gallego; Farmacia Rivas; Ferretería Quintana; Ferretería Vera; Gaia Salón; Joyería Díaz; Joyería Salgado/Óptica e Audición Adrián Salgado; Juguetería 1,2,3, escondite inglés; Lar de Menchu; Librería Lago; Linva; Los sueños de Uxía; Mercería El Dedal; Mercería Lucía; Mercería Sarillo; Micsport; Moncho Moda; Moreno Sarria; Nekus; Óptica Bety Prado; Óptica Malecón; Orange; Oso Blanco; Panadería Pallares; Peluquería Artelís; Peluquería Cortex; Peluquería Dolche; Perfumería Barreiros; Pikaros Story; Piltras; Sabrina Moda; Santamarta; SD Kats; Senayo; Soños; Termas Cris; Trece Tablas Store; Ultreia; Vidul; Vilamey e Zaida.
- Locais de hostalaría participantes: Café Bar Atlántico; Café Bar Cubano; Cafetería Bule Bule; Cafetería Next; Chamorrego; Ecoespazo Vitriol; El Faro; El Parisien; Hotel Alfonso IX; Mercado Paladar Gourmet; Mesón O Castro; Mesón Roberto; Pizzería Salento; Pulpería A Cantina; Restaurante Camping Vila de Sarria; Restaurante O Chanto; Restaurante Santiago; Taberna D’Orixen; Tapería J de Jato e Terraza Yogui.
Hoxe comeza a maxia
Desde este luns 17, só tes que estar atento cando pases polos establecementos participantes.
Busca as Caixiñas dos Desexos, completa a túa Tarxeta Mágica, descubre os Manteis do Xantar Feiticeiro, consegue a túa pulseira e, sobre todo, forma parte dunha vila enteira cómplice da lenda.
💙 EU SON NOITE MEIGA · 2026 💙
A Noite Meiga xa comezou a percorrer Sarria.
