Tras aqueles primeiros anos de actividade e crecemento, a entidade foi constituída oficialmente en 1976, ano no que obtivo a autorización para a creación e funcionamento como Centro de Iniciativas Turísticas «Asociación Cultural Meigas e Trasgos», segundo recolle o Boletín Oficial do Estado.

Ao longo de máis de medio século de historia, Meigas e Trasgos consolidouse como un referente cultural en Galicia, desenvolvendo unha intensa actividade na promoción da música e da danza tradicional, así como na conservación das nosas costumes e do patrimonio inmaterial galego.

Na actualidade, a asociación está formada por grupos de baile tradicional, gaita, percusión, pandeireta e canto tradicional, ademais dunha escola na que persoas de todas as idades poden achegarse á cultura galega, garantindo a transmisión deste legado ás novas xeracións.

A organización da Noite Meiga de Sarria constitúe a súa iniciativa máis representativa. Celebrada cada último sábado de agosto, converteuse nun dos acontecementos culturais máis emblemáticos da provincia de Lugo e nun símbolo da identidade sarriá, reunindo cada ano milleiros de persoas arredor da música, a danza, o lume e a mitoloxía galega. En 2026, esta celebración foi recoñecida pola Xunta de Galicia como Festa de Interese Turístico de Galicia, un recoñecemento ao traballo desenvolvido durante décadas por centos de persoas que fixeron posible manter viva esta tradición.

Fieis ao espírito co que naceu en 1969, continuamos traballando para preservar, promover e transmitir a cultura tradicional galega, mantendo vivas as nosas raíces e facendo da participación, da convivencia e do compromiso coa nosa identidade os piares fundamentais da Asociación Cultural Meigas e Trasgos.